Қазақстанда көктемгі егіс науқанын қаржыландыру аяқталды

Қазақстанда ағымдағы жылдың көктемгі егіс және егін жинау жұмыстарын (КЕЖЖ) қаржыландыру аяқталды. Бұл жұмысты «Бәйтерек» холдингі «Аграрлық несие корпорациясы» еншілес ұйымы (АНК) арқылы жүргізді.


Ағымдағы жылы 2611 ауыл кәсіпкеріне 70 млрд. теңге сомасында бюджеттік қарыздар берілді. «Кең дала» кредит беру бағдарламасымен жылдық 5%-ға дейін жеңілдетілген мөлшерлемемен 3,3 млн. га алқаптағы жұмыстар қаржыландырылды, өңірлер бойынша өтінімдердің басым бөлігі дәстүрлі түрде Солтүстік Қазақстан, Қостанай, Ақмола, сондай-ақ Түркістан облыстарынан келіп түсті. Мәселен, Түркістан облысының өзінде биылғы жылы жалпы сомасы 5,7 млрд теңге болатын жеңілдетілген қарызды 1 438 ауыл шаруашылығы өндірушісі (АШТӨ) алды.


Корпорация 2016 жылдан бастап көктемгі егіс және егін жинау жұмыстарының ірі қаржы операторы болып табылады. Осы мақсаттарды іске асыруға республикалық бюджеттен жыл сайын жеңілдікті қарыздар түрінде қаражат бөлінеді. Өткен жылдан бастап Мемлекет басшысы Қасым-Жомарт Тоқаевтың тапсырмасы бойынша КЕЖЖ өткізу сомасы 70 млрд теңгеге дейін ұлғайтылды.


«Кең дала» бағдарламасының арқасында фермерлер егін егу науқанын уақытында бастады, пестицидтер мен тыңайтқыштарды, сапалы тұқымдар мен ЖЖМ, ауыл шаруашылығы техникасын жөндеуге арналған қосалқы бөлшектерді сатып алуға айналым қаражатын толықтырды, сондай-ақ қызметкерлердің жалақысын төлейді. Қарыздар жылдық 1,5%-дан бастап, бірақ соңғы қарыз алушы үшін жылдық 5%-дан аспайтын жеңілдікті пайыздық мөлшерлеме бойынша беріледі.


Көктемгі дала жұмыстарының маусымы өте қысқа уақыт кезеңі. Шектеулі мерзім жағдайында кредит беруге шаруашылықтар мен агроқұрылымдардан өтінімдердің үлкен ағыны қалыптасады. Мысалы, ағымдағы жылы 2 611 өтінім берілді, бұл өткен жылғы ұқсас көрсеткіштен 7%-ға артық.


Кредит беру мерзімдерін барынша жеделдету және қолжетімділігін кеңейту, сондай-ақ АШТӨ-нің көп санын қамту мақсатында Аграрлық кредиттік корпорация қорландыру арқылы басқа қаржы институттарының: 30 мыңнан астам АШТӨ-ні біріктіретін екінші деңгейдегі банктердің, микроқаржы ұйымдарының, 217 кредиттік серіктестіктің мүмкіндіктері мен кең желісін тартады.


Биыл 70 млрд теңгенің 63 млрд теңгесі қаржы институттарын қорландыру арқылы бөлінді.